సమాచార లోపం వల్ల రూ.60 కోట్ల నిధులు నిరుపయోగం: రూ.20 వేలు ఫ్రీగా ఆర్థిక సహాయం | National Family Benefit Scheme 2025
కేంద్ర ప్రభుత్వం దేశంలో పేద, మధ్యతరగతి ప్రజల సంక్షేమం కోసం అనేక పథకాలను అమలు చేస్తోంది. వీటిలో చాలా వరకు పథకాల గురించి సరైన అవగాహన లేకపోవడం వల్ల లబ్ధిదారులు వాటిని సద్వినియోగం చేసుకోలేకపోతున్నారు. అలాంటి వాటిలో ఒకటి జాతీయ కుటుంబ ప్రయోజన పథకం (National Family Benefit Scheme – NFBS). ఈ పథకం కింద కుటుంబ పెద్ద దురదృష్టవశాత్తు మరణిస్తే, వారి కుటుంబానికి రూ.20 వేల ఆర్థిక సహాయం అందజేస్తారు. ఈ పథకం గురించి అవగాహన లోపం వల్ల వేల మంది అర్హులు లబ్ధి పొందలేకపోతున్నారు. అధికారులు అంచనా వేసిన దాని ప్రకారం, సెర్ప్ (Society for Elimination of Rural Poverty) వద్ద ఈ పథకానికి సంబంధించిన రూ.60 కోట్లు నిధులు ఖర్చు కాకుండా అలాగే ఉన్నాయి.
జాతీయ కుటుంబ ప్రయోజన పథకం అంటే ఏమిటి?
పేదరికంలో ఉన్న కుటుంబాలకు భరోసా ఇవ్వాలనే ఉద్దేశంతో కేంద్ర ప్రభుత్వం ఈ జాతీయ కుటుంబ ప్రయోజన పథకం (NFBS)ను తీసుకువచ్చింది. గ్రామీణ ప్రాంతాల్లో వ్యవసాయ కూలీలు, చిరు ఉద్యోగులు, దారిద్య్రరేఖకు దిగువన (BPL) ఉన్నవారిని లక్ష్యంగా చేసుకుని ఈ పథకాన్ని రూపొందించారు. కుటుంబ పెద్ద రోడ్డు ప్రమాదంలో కానీ, లేదా ఇతరత్రా ఏ కారణం చేత అయినా మరణిస్తే, ఆ కుటుంబానికి రూ.20 వేలు ఆర్థిక సహాయం అందజేస్తారు. అయితే, ఈ పథకం కింద ఆర్థిక సహాయం పొందడానికి కొన్ని నిబంధనలు ఉన్నాయి. మరణించిన కుటుంబ పెద్ద వయసు 18 నుంచి 60 ఏళ్ల మధ్యలో ఉండాలి. అలాగే, కుటుంబ పెద్ద మరణించిన తర్వాత రెండేళ్ల లోపు దరఖాస్తు చేసుకోవాల్సి ఉంటుంది.
దరఖాస్తు ప్రక్రియ ఎలా ఉంటుంది?
జాతీయ కుటుంబ ప్రయోజన పథకం ద్వారా ఆర్థిక సహాయం పొందడానికి కొన్ని పత్రాలు అవసరం. దరఖాస్తుతో పాటు మరణ ధ్రువీకరణ పత్రం, ఆధార్ కార్డు, బ్యాంకు ఖాతా వివరాలు, రేషన్ కార్డు మరియు కుల ధ్రువీకరణ పత్రాలను జత చేయాలి. ఈ పత్రాలతో దరఖాస్తు చేసుకున్న తర్వాత తహసీల్దార్‌కు సమర్పించాలి. ఆ తర్వాత, ఐకేపీ (Indira Kranthi Patham), రెవెన్యూ అధికారులు దరఖాస్తును పరిశీలించి, ఆర్డీఓ (Revenue Divisional Officer)కు పంపుతారు. అక్కడి నుంచి ఈ దరఖాస్తు సెర్ప్ సీఈఓ (CEO)కి వెళ్తుంది. సెర్ప్ ఆమోదం లభించిన తర్వాత రూ.20 వేల ఆర్థిక సహాయం లబ్ధిదారుని బ్యాంకు ఖాతాలో నేరుగా జమ అవుతుంది.
అయితే, చాలా జిల్లాల్లో ఈ పథకం గురించి అవగాహన లేకపోవడం వల్ల దరఖాస్తులు దాదాపు లేవని అధికారులు చెబుతున్నారు. సరైన సమాచారం లేకపోవడంతో చాలా మంది అర్హులు ఈ ఆర్థిక సహాయాన్ని పొందలేకపోతున్నారు. గ్రామీణ, మండల స్థాయిలో అధికారులు ఈ పథకంపై ప్రజలకు మరింత అవగాహన కల్పించాల్సిన అవసరం ఉంది. కుటుంబ పెద్ద మరణించిన బాధలో ఉన్న కుటుంబాలకు ఈ ₹20,000 ఆర్థిక సహాయం కొంతమేరకైనా ఊరటనిస్తుంది. ఈ పథకం గురించి మరింత మందికి తెలియజేయడం ద్వారా అర్హులందరూ లబ్ధి పొందడానికి అవకాశం ఏర్పడుతుంది. ఈ జాతీయ కుటుంబ ప్రయోజన పథకం గురించి మీ స్నేహితులు మరియు బంధువులకు తప్పకుండా తెలియజేయండి.
